Գյումրու խորհրդանիշները
Գյումրու զինանշանը
2001 թ. համայնքի ավագանու որոշմամբ հաստատվել է քաղաքի զինանշանը՝
Զինանշանի հետևյալ նշանակությունն ունի.
- Հովազը - Բագրատունիների զինանշանն է, իսկ նրանց նստավայրը եղել է Շիրակի մարզում:
- Կամարը, Արագած լեռը և եկեղեցին - որպես Գյումրի քաղաքին բնորոշ բնության և ճարտարապետական տարրեր,
- Լուսավորիչի կանթեղն - ըստ լեգենդի, որ Լուսավորիչի կանթեղն այրվում է Արագածի գագաթների միջև,
- Շաղուլը - որպես արհեստների և ճշտապահության խորհրդանիշ,
- Ցորենի հասկերը - որպես լիության խորհրդանիշ,
- Գիրքն ու քնարը – կրթության ու գիտության, արվեստի ու մշակույթի խորհրդանիշներ:
Գյումրու դրոշը
2011 թ. համայնքի ավագանու որոշմամբ հաստատվել է քաղաքի դրոշը`
- Գյումրի քաղաքի դրոշը սպիտակ է` ոսկեզօծ երիզով,
- Կենտրոնում կարմիր խաչ է` հովազի ոսկեգույն պատկերով,
- Դրոշի լայնության և երկարության չափերի հարաբերությունն է 1:2-ի,
- Սպիտակ գույնը խորհրդանշում է խաղաղ ապրելու կամքը,
- Կարմիր խաչը ժողովրդի հարատևման և քրիստոնեական հավատքի խորհրդանիշն,
- Բագրատունյաց զինանշանը հանդիսացող ոսկեգույն հովազը խորհրդանշում է Հայաստանի անկախությունն ու պետականությունը:
Գյումրու օրհներգը
Խոսքը` Հովհաննես Շիրազի
Երաժշտությունը՝ Վլադիլեն Բալյանի
ՀՀ ժող․ արտիստ Ռուբեն Մաթևոսյանի կատարմամբ
Գյումրի-Լենինական
Հայաստանի աղն ես, Գյումրի,
Դու խոսքաշեն, սրամիտ,
Ճշմարտության մաղն ես, Գյումրի,
Դու իմաստուն, միամիտ:
Աղջիկներդ տնարար են,
Անմահության օրորոց,
Տղաներդ շինարար են,
Դու հանճարեղ քարագործ:
Դու իմ Գյումրի, Լենինական դու իմ նոր,
Արագածին բազմած արծիվ փառավոր:
Դու երգարան Հայաստանի,
Երգիչների ակնաղբյուր,
Հերիք է լա քաղաքն Անի,
Ել, մի կյանք էլ նրան տուր:
Արագածդ արքայական
Ոսկե թագն է քո հողի.
Քո մի քարն էլ Լենինական,
Աշխարհի հետ չեմ փոխի:
Դու իմ Գյումրի, Լենինական դու իմ նոր,
Արագածին բազմած արծիվ փառավոր:
Դու իմ անուշ ծննդավայր,
Շիրազամայր իմ Գյումրի,
Դու մի բուռ ես, բայց մի աշխարհ.
Դու իմ արծիվ, իմ ղումրի:
Շիրազն ասաց` գիշեր ու տիվ
Քեզ եմ երգում, իմ Շիրակ,
Արագածին բազմած արծիվ,
Հավերժ կապրես իմ քաղաք:
Դու իմ Գյումրի, Լենինական դու իմ նոր,
Արագածին բազմած արծիվ փառավոր: